Në kuadër të përpjekjeve për të përmirësuar aftësitë profesionale të infermiereve të familjes gjatë ofrimit të Kujdesit Shëndetësor në Banesë, HAP mbështeti zhvillimin e trajnimeve për trajnerë lidhur me procedurat standarde infermierore të cilat u mbyllën tashmë me sukses në 27 qendra shëndetësore në Njësitë Vendore të Kujdesit Shëndetësor të Tiranës, Durrësit, Elbasanit, Korçës, Beratit, dhe Shkodrës.
Programi 5-ditor i trajnimit trajtoi realizimin e 18 procedurave infermierore të rëndësishme duke ndërthurur njohuritë teorike me zbatimin praktik dhe me shkëmbimin e përvojave reale të kujdesit në banesë, çka bënë që trajnimi të rrisë ndjeshëm kompetencën profesionale të infermiereve në menaxhimin e situatave të ndryshme shëndetësore që lindin gjatë ofrimit të kujdesit shëndetësor në banesë.
Gjatë trajnimit u përdorën me efikasitet prezantimet, videot, si edhe Manuali i Procedurave Standarde Infermierore të hartuar me mbështetjen e HAP. Trajnimi u mbajt nga ekspertë të fushës dhe siguroi një pjesëmarrje aktive të të gjithë infermiereve pjesëmarrëse të cilat përdorën pajisje dhe materiale të posaçme për praktikimin e procedurave në fjalë në manekinët e vënë në dispozicion.
Trajnimi për procedurat standarde infermierore jo vetëm që forcon kapacitetet profesionale të infermiereve, por gjithashtu thekson rolin e tyre të rëndësishëm në mjekësinë familjare dhe respektimin e të drejtës së pacientëve për të marrë kujdes shëndetësor cilësor në banesë.