Kanë përfunduar me sukses trajnimet për trajnerë të mjekëve, infermierëve, punonjësve socialë dhe psikologëve të familjes të 29 qendrave shëndetësore në Durrës, Elbasan, Fier, Burrel, Korçë, Shkodër mbi “Përdorimin e Udhëzuesit për Menaxhimin e çrregullimeve të shëndetit mendor në Kujdesin Shëndetësor Parësor”.
Qëllimi i këtyre trajnimeve për trajnerë ishte aftësimi i pjesëmarrëve për përdorimin e udhëzuesit për menaxhimin e çrregullimeve të shëndetit mendor dhe instrumenteve klinikë përkatës dhe, më tej, përcjelljen e këtyre njohurive dhe aftësive kolegëve të tyre në nivel qendre shëndetësore në formën e Grupit të Kolegëve.
Gjatë trajnimit u trajtuan parimet kryesore të kujdesit për personat me çrregullime të shëndetit mendor duke u përqendruar konkretisht në stresin akut, pikëllimin, depresionin, skizofreninë, përdorimin e dëmshëm të alkoolit dhe drogave, vetëvrasjen dhe sjelljet e tjera dëmtuese. Pjesëmarrësit trajtuan raste klinike për secilën situatë duke u angazhuar në lojë me role, diskutime në grupe të vogla e prezantime në grupe të mëdha duke nxitur kështu pyetje-përgjigje si edhe sqarime e diskutime të mëtejshme mbi përdorimin e instrumenteve klinike të nevojshme për secilin rast.
Një pjesë e rëndësishme e trajnimit ishte edhe aftësimi i pjesëmarrësve për ngritjen e Grupit të Kolegëve në qendrat shëndetësore përkatëse ku përfshihet prezantimi i dokumenteve për aplikim si Kalendari i Takimeve; Formulari i Aplikimit, Formulari i Vlerësimit, Certifikata, Linku për materialet e trajnimit, Model CV-je. Përmes ngritjes së Grupeve të Kolegëve, mundësohet edhe realizimi i mëtejshëm i trajnimit për pjesën tjetër të mjekëve dhe infemiereve të familjes, punonjësve socialë e psikologëve që punojnë në këto qendra shëndetësore.
Trajnimi u ofrua në bashkëpunim me Qendrën Analitica dhe të trajnerëve të saj Dr. Neli Demi dhe Msc. Sonila Meçaj.