HAP pati kënaqësinë të priste një ekip nga Universiteti Mjekësor i Vjenës, të interesuar për të mësuar më shumë rreth kulturës shqiptare, sistemit shëndetësor dhe praktikave shëndetësore në komunitet.
Nën drejtimin e Prof. Dr. Türkan Akkaya-Kalayci, Drejtuese e Programit të Masterit Pasuniversitar në Mjekësinë Transkulturore dhe Kujdesin për Diversitetin, delegacioni përfshinte studentë dhe disa profesorë.
Më 13 maj, ekipi i Projektit Shëndeti për të Gjithë (HAP) organizoi një sesion informues që u fokusua në historinë dhe sfondin e shërbimeve të Kujdesit Shëndetësor Parësor (KSH) në Shqipëri. Më 14 maj, delegacioni gjithashtu vizitoi Qendrën Socio-Shëndetësore të Vorës ku pati mundësinë të vëzhgonte nga afër organizimin e punës dhe shërbimin e ofruar brenda kujdesit shëndetësor parësor në vend.
Këto aktivitete ofruan mundësi të vlefshme për ndarjen e njohurive dhe përvojave rreth sistemit tonë shëndetësor dhe diversitetit kulturor në Shqipëri.
Ekipi qëndroi në Tiranë deri më 17 maj dhe vizitoi shërbime të tjera shëndetësore përfshirë qendra të shëndetit mendor dhe spitale.
Jemi mirënjohës ndaj të gjithë stafit të Qendrës Shëndetësore të Vorës për bashkëpunimin dhe ekipit nga Universiteti i Vjenës për këtë shkëmbim të pasur përvojash.