Më 3 prill 2025 HAP organizoi takimin e 20të të Komitetit Drejtues të projektit me qëllim prezantimin dhe miratimin e Planit Vjetor të Aktiviteteve gjatë vitit të tretë të Fazës së Konsolidimit, periudha 1 prill, 2025-31 mars, 2026.
Fjalën përshëndetëse e mbajtën përfaqësues të ambasadës së zvicrës në Tiranë, Agjencisë Zvicerane për Zhvillim dhe Bashkëpunim (SDC) dhe Ministrisë së Shëndetësisë dhe Mbrojtjes Sociale. Ndërkaq tryeza mblodhi edhe përfaqësues të institucioneve shëndetësore më të rëndësishme në vend si Operatori i Shërbimeve të Kujdesit Shëndetësor (OShKSh), Fondit të Sigurimit të Detyrueshëm të Kujdesit Shëndetësor (FSDKSh), Agjencisë së Sigurimit të Cilësisë së Kujdesit Shëndetësor dhe Shoqëror dhe përfaqësues bashkish e organizatash të shoqërisë civile.
Në prezantimin e aktiviteteve të projektit për vitin 2025-2026, Menaxheri i Projektit, Dr. Besim Nuri theksoi se HAP do të vijojë të luajë një rol kyç në forcimin e kujdesit parësor dhe zgjerimin e shërbimeve të kujdesit në shtëpi në Shqipëri. Një nga objektivat kryesorë do të jetë mbështetja e Ministrisë së Shëndetësisë dhe Mbrojtjes Sociale në përhapjen dhe zbatimin kombëtar të këtyre shërbimeve, duke siguruar një qasje më të strukturuar dhe efikase për pacientët në nevojë. Për këtë qëllim, HAP do të ndihmojë në hartimin dhe shpërndarjen e një manuali të detajuar për implementimin e kujdesit në shtëpi, duke siguruar që të gjitha qendrat shëndetësore të jenë të pajisura me udhëzime të qarta mbi procedurat dhe standardet që duhet të ndjekin.
Një tjetër aspekt i rëndësishëm i punës së HAP do të jetë forcimi i kapaciteteve institucionale. OShKSh do të përfitojë nga trajnime dhe mentorim për të rritur aftësitë e saj në monitorim dhe udhëheqje, ndërsa Njësitë Vendore të Kujdesit Shëndetësor do të mbështeten në mënyrë të vazhdueshme për të përmirësuar aftësitë e tyre në planifikimin dhe identifikimin e përfituesve të shërbimeve të kujdesit në shtëpi. Ky proces do të shoqërohet me trajnime të specializuara për infermierët, duke përfshirë zhvillimin e materialeve didaktike dhe videove instruktive mbi procedurat klinike.
Në përpjekje për të modernizuar sistemin shëndetësor, HAP do të mbështesë edhe përdorimin e teknologjisë në praktikën mjekësore. Mjekët e familjes do të trajnohen për të përdorur instrumentet klinike që tashmë janë pjesë e platformës së FSDKSh-së, me qëllim përmirësimin e menaxhimit të sëmundjeve kronike dhe ofrimin më efikas të kujdesit në shtëpi. Në të njëjtën kohë, do të vijojë furnizimi i qendrave shëndetësore me pajisje të nevojshme mjekësore dhe IT, duke siguruar që edhe qendrat e mbetura nga fazat e mëparshme të projektit të përfitojnë nga kjo mbështetje.
Për të siguruar qëndrueshmërinë e këtyre përpjekjeve, HAP do të fokusohet edhe në avokim dhe bashkëpunim me palët e interesit. Organizatat e shoqërisë civile do të mbështeten për të ndërmarrë iniciativa që synojnë një financim më të mirë të kujdesit parësor, ndërsa bashkëpunimi me mediat do të shërbejë për të rritur ndërgjegjësimin mbi rëndësinë e këtyre shërbimeve.
Padyshim që realizimi i këtyre aktiviteteve paraqet edhe sfida të ndryshme. Zgjerimi i shërbimeve përtej 17 LUHC-ve të mbështetura nga HAP paraqet një rrezik të madh për përmbushjen e objektivave vjetore, ndërsa ndryshimet e mundshme në administratën shëndetësore pas zgjedhjeve legjislative mund të krijojnë vonesa në zbatimin e aktiviteteve të planifikuara.
Në këtë kontekst, suksesi i projektit do të varet edhe nga autonomia dhe angazhimi i NjVKSj-ve dhe Operatorëve Rajonalë për të vijuar trajnimet dhe për të marrë një rol proaktiv në monitorimin e shërbimeve të kujdesit në shtëpi dhe zbatimin e protokolleve për sëmundjet kronike. Me një qasje të koordinuar dhe të qëndrueshme, HAP synon të kontribuojë në një sistem shëndetësor më të fortë dhe më të aksesueshëm për qytetarët shqiptarë, veçanërisht për të moshuarit dhe grupet e tjera vulnerabël.
Mbledhja u mbyll me miratimin e Planit Vjetor të Aktiviteteve dhe me angazhimin e partnerëve për shtrirjen e mëtejshme të ndërhyrjeve të realizuara nga HAP.