Mbështetja zvicerane arrin në qendrat shëndetësore në Finiq dhe Dropull

Qendrat shëndetësore në bashkitë e Finiqit dhe Dropullit marrin pajisje dhe furnizime mjekësore për të përballuar më mirë trajtimin e Covid-19.

Përmes një bashkëpunimi midis ambasadave të Zvicrës dhe Greqisë, pajisje dhe furnizime mjekësore u dorëzuan në qendrën shëndetësore të Alikos, në bashkinë Finiq. Infermierët dhe mjekët gjithashtu u trajnuan për përdorimin e pajisjeve.

Qendra shëndetësore në Aliko jep kujdes parësor për pacientë vizitorë por gjithashtu edhe përmes konsultimeve të lëvizshme tek rreth 5,000 banorë që jetojnë në bashkitë Finiq dhe Dropull. Pajisjet do të ndihmojnë mjekët dhe infermierët që të përballojnë më mirë Covid-19 dhe të sigurojnë shërbime më të mira shëndetësore sidomos për numrin e lartë të të moshuarve që jetojnë në zonat rurale. Këto dy bashki kanë një shkallë të lartë të emigrimit të të rinjve në Greqi.

“Falënderojmë përzemërsisht Ambasadën Zvicerane për dhurimin bujar, për Qendrën Shëndetësore Aliko, të Bashkisë Finiq, Sarandë. Ndihmat e dërguara u shpërndanë në disa fshatra dhe gjithashtu u pajis ambulanca e komunës duke mundësuar mbulimin me ndihmën e shpejt të  një zone shumë më të gjerë”, tha Bruna Çela, mjeke e përgjithshme në qendrën shëndetësore.

Pajisjet dhe furnizimet kapin vlerën e mbi 8,000 Euro dhe u prokuruan nga ‘Shëndet për të Gjithë’ – një projekt nga Agjencia Zvicerane për Zhvillim dhe Bashkëpunim SDC. Ato përfshijnë 4 aparate oksigjeni të lëvizshme që sigurojnë furnizim me oksigjen në shtëpi për rastet e rënda të Covid-19 si dhe për sëmundje të tjera. Gjithashtu, mjekët dhe infermierët morën pajisje personale mbrojtëse, aparate për ekzaminim fizik dhe oksimetra.

“Kemi aparate oksigjeni që prodhojnë 10 litra oksigjen. Kemi shumë fshatra dhe jo të gjithë mund të shkojnë në spitalin e Sarandës dhe prandaj tani mund t’u shërbejmë qytetarëve në shtëpitë e tyre”, tha Eleni Papa, Koordinatore për bashkitë Finiq dhe Dropull.

Pas një trajnimi themeltar për përdorimin e pajisjeve ekipi i projektit ‘Shëndet për të Gjithë’ diskutoi me qendrën shëndetësore mbi një program të ardhshëm për të forcuar kapacitetet e mjekëve dhe infermierëve për përmirësimin e shërbimeve të kujdesit parësor.

Zvicra ka dhënë një mbështetje të shpejtë dhe të përgjigjshme ndaj Shqipërisë për të përballuar Covid-19 dhe aktualisht është partneri ndërkombëtar kryesor për fushën e kujdesit shëndetësor parësor në vend.